O‘zDJTSU: oliygoh jamoasi va harbiylar ishtirokida sport musobaqasi tashkil etildi

Bugun O‘zbekiston davlat jismoniy tarbiya va sport universitetida O‘zbekiston Respublikasi IIV Qorovul qo‘shinlari 7535 harbiy qism bilan hamkorlikda Prezidentning 2022-yil 3-noyabrdagi “Jismoniy tarbiya va sport sohasida kadrlarni tayyorlash hamda ilmiy tadqiqotlar tizimini yanada takomillashtirish chora-tadbirlari to‘g‘risida”gi Qarorida belgilangan universitetda tahsil olayotgan talaba-yoshlarni vatanparvarlik ruhida tarbiyalash hamda ularda ona Vatanga bo‘lgan sadoqat hissasini yanada kuchaytirish maqsadida respublikadagi harbiy qismlar bilan hamkorlikda turkum tadbirlarni tashkil etish kabi maqsadli ko‘rsatkichlar ijrosini ta’minlash, shuningdek, O‘zbekiston Respublikasi Qurolli Kuchlari tashkil etilganligining 31 yilligi va Vatanparvarlik oyligi munosabati bilan sportning voleybol va mini futbol turlaridan oliygoh jamoasi va harbiylar ishtirokida o‘rtoqlik o‘yini tashkil qilindi.

Unda universitet Yoshlar masalalari va ma’naviy-ma’rifiy ishlar bo‘yicha birinchi prorektori N.Dusanov, O‘zbekiston Respublikasi IIV Qorovul qo‘shinlari 7535 harbiy qism komandiri T.Abdumajitov, harbiy qism shaxsiy tarkibi, Yoshlar bilan ishlash ma’naviyat va ma’rifat bo‘limi boshlig‘i R.Babajanov, fakultet dekanlari va ularning o‘rinbosarlari, kafedra mudirlari, professor-o‘qituvchilar, tyutorlar hamda talabalar ishtirok etishdi.

Dastlab tadbirni universitet Yoshlar masalalari va ma’naviy-ma’rifiy ishlar bo‘yicha birinchi prorektori N.Dusanov ochib berdi. O‘z navbatida, 7535 harbiy qism komandiri T.Abdumajitov tomonidan ham bu kabi tadbirlarning tashkil etilishi va ularning talabalar hayotidagi ahamiyati to‘g‘risida fikr-mulohazalar bildirildi.

Shundan so‘ng, sportning voleybol va mini futbol turlari bo‘yicha universitet jamoasi va harbiylar ishtirokidagi o‘rtoqlik o‘yinlariga start berildi.