Кўнё – 2021. Жорий йилнинг 6 – 18 август кунлари барчанинг диққат эътибори Туркиянинг Кўнё шаҳрида ўтказилган V Ислом бирдамлиги спорт ўйинларига қаратилди. Дунёнинг 56 та мамлакатидан ташриф буюрган спортчилар турли спорт турлари бўйича чинакамига баҳс олиб борди.
Муносиб иштирок. Аҳамиятли жиҳати, мазкур спорт ўйинларида Ўзбекистон делегациясидан 256 нафар спортчиларимиз спортнинг 24 та тури бўйича қатнашди ва муносиб иштирокчи давлат сифатида тан олинди, десак муболаға бўлмайди. Юрт ишончини оқлашга аҳд қилган ҳар бир спортчимиз беллашув шоҳсупасига чиқар экан, ўзларидаги бор жасорат ҳамда маҳоратини намоён қила олди.
Якуний натижалар. Бундай муносиб иштирокни эришилган ғалаба, қўлга киритилган медаллар шодаси билан исботлаш мумкин. Делегациямиз аъзолари 158 та медаль (51 та олтин, 42 та кумуш ва 65 та бронза) жамғариб, давлатлар ўртасида умумжамоа ҳисобида 2-ўринни қўлга киритишди. Спортчилар оиласининг вакиллари совриндорлар сафида. Яна бир фахр билан тилга олинадиган жиҳат ҳам борки, у ҳам бўлса V Ислом бирдамлиги ўйинларидаги совриндорларнинг аксарияти Ўзбекистон давлат жисмоний тарбия ва спорт университетининг собиқ ва ҳозирда таҳсил олаётган истеъдодли талаба-ёшларидир.
Аниқ фактларга асосланадиган бўлсак, 47 нафар ЎзДЖТСУ талабалари иштирок этиб, жами 44 та медаль, шундан 17 та олтин, 15 та кумуш ва 12 та бронза медалларини қўлга киритlи. Биргина спортнинг оғир атлетика йўнилиши бўйича иштирок этган талабаларимиз 7 та олтин, 2 та бронза медалларини қўлга киритиб, мусобақа рекордчисига айланди. Шу билан бирга, таэквондо 1 та олтин, 2 та бронза, қиличбозлик 1 та олтин, 1 та бронза ва 6 та кумуш, дзюдо 2 та олтин, бадиий гимнастика 1 та олтин, 1 та бронза ва 3та кумуш, гимнастика 2 кумуш, 1 та олтин, енгил атлетика йўналишидаги талабаларимиз ҳам ўзларининг муносиб иштироклари билан тенгдошларининг, қолаверса, бутун ўзбек халқининг олқишига сазовор бўлишди.
Мазкур спортчиларни рағбатлантириш мақсадида Президентимизнинг “Кўнё шаҳрида (Туркия) бўлиб ўтган V Ислом бирдамлиги ўйинларида ғолиб ва совриндор бўлган спортчилар ҳамда уларнинг тренерларини бир марталик пул мукофотлари билан рағбатлантириш тўғрисида“ ги қарори қабул қилинди.
Буларнинг барчаси юртимизда спортга, соғлом турмуш тарзига бўлган юксак эътиборнинг амалдаги ифодасидир. Зеро, фарзандлари ҳам маънан ҳам жисмонан соғлом юртдагина юксалиш, ривожланиш бўлади.
Маҳмуджон Болтабоев,
Ўзбекистон давлат жисмоний тарбия
ва спорт университет ректори, профессор