O‘zDJTSUda Paralimpiya o‘yinlari qahramonlari bilan uchrashuv tashkil etildi!

#uchrashuv

Bugun O‘zbekiston davlat jismoniy tarbiya va sport universitetida  butun dunyoning diqqat markazida bo‘lgan Parij-2024 XVII yozgi Paralimpiya o‘yinlarida o‘z tarixida eng yaxshi natijalarni qayd etgan sportchilarimiz bilan uchrashuv bo‘lib o‘tdi.

Unda universitet rektori Rashid Matkarimov boshchiligida universitet jamoasi tomonidan Paralimpiya o‘yinlari chempioni, universitet bitiruvchisi Tolibboy Yo‘ldoshev, sovrindor Kubaro Hakimova, Universitetning Yengil atletika, biatlon nazariyasi va uslubiyati kafedrasi dotsenti, Yengil atletika bo‘yicha O‘zbekiston milliy paralimpiya terma jamoasi murabbiyi, O'zbekiston Respublikasida xizmat ko'rsatgan sport ustozi Ibroximjon Yusupov, murabbiylar, Mehnat shuhrati ordeni sohiblari Sardor Abduxoliqov va Mavlonbek Xaydarov tantanali tarzda kutib olindi.

Uchrashuv davomida universitet rektori Paralimpiya o‘yinlarida o‘zining azm-u shijoati va mahorati, mustahkam iroda va jasoratini namoyon etib, Vatanimiz tarixida mislsiz natijalarga erishgan terma jamoamiz safida O‘zbekiston davlat jismoniy tarbiya va sport universitetining bitiruvchi talabalari ham borligi oliygohdagi barchaga katta g‘urur va iftixor bag‘ishlashi, shu bilan birga  mamlakatimizda jismoniy tarbiya va sportni rivojlantirish, malakali kadrlarni tayyorlash, sport ilmini yuksaltirish hamda sog‘lom turmush tarzini targ‘ib qilishda universitetning ahamiyati ulkan ekanligini qayd etib o‘tdi.

Shuningdek, ushbu yutuqlarning tag zamirida mashaqqatli mehnat va tinimsiz olib borilgan mashg‘ulotlar yotgani, xususan, paralimpiya sport turlariga qaratilayotgan e’tibor va bu sohada qilinayotgan islohotlar bugun o‘z natijalarini ko‘rsatgani to‘g‘risida ham fikr-mulohazalar bildirildi. 

Tadbirda so‘z olgan O‘zbekiston milliy paralimpiya terma jamoa murabbiylari, Paralimpiya o‘yinlari g‘olib va sovrindorlari hamda ularning ota-onalari ham o‘zlarining taassurotlari bilan o‘rtoqlashdi.

Uchrashuv yakunida universitet rektori tadbir qahramonlari bo‘lgan g‘olib va sovrindorlarimizni O‘zbekiston davlat jismoniy tarbiya va sport universitetining esdalik sovg‘alarini topshirib, chempion sportchilarni magistratura va undan yuqori bosqichlarda o‘qishlarini davom ettirish taklifini bildirdi va ularga kelgusidagi faoliyatida ham ulkan zafarlar tilab qoldi.