Sportchilar oilasida Sumalak sayli boshlandi…

#Sumalak_sayli

Bugun O‘zbekiston davlat jismoniy tarbiya va sport universiteti Talabalar turar joyi hovlisida butun o‘zbek xalqi orziqib va sog‘inib kutadigan yangilanish va yasharish ayyomi – Navro‘z bayrami munosabati bilan Sumalak sayli boshlandi.

Unda universitetning birinchi prorektori N.Dusanov, bo‘lim boshliqlari, fakultet dekanlari va ularning o'rinbosarlari, xotin-qizlar kengashi a’zolari, TTJ tarbiyachi pedagoglari, tyutorlar hamda erta-tongdan sumalak tayyorlanishiga o‘zlarining ulkan hissasini qo‘shishga shoshilgan talaba-yoshlar ishtirok etdilar.

Barchaning yuziga xush kayfiyat ulashgan mazkur sayl davomida universitet rahbariyati jamoasi talaba-qizlar va ularga ko‘makdosh bo‘lgan o‘qituvchilar tomonidan tayyorlangan milliy taomlardan tannovul qilib, bayramona tarzda bezatilgan dasturxonlarga yuksak baho berishdi. Shuningdek, ko‘kka uchishga hozirlanayotgan varraklar ham hammaga quvonch baxsh etdi.

Eslatib o‘tamiz, oliygohda boshlangan ushbu Navro‘z saylining o‘ziga xos hamda qizg‘in jarayonlarga boy qismi ertaga ham davom etadi!