Yoshlar siyosatida yangi bosqich: imkoniyatlar natijaga eltadi!

#munosabat

Yoshlar siyosatida yangi bosqich: imkoniyatlar natijaga eltadi!
 

➡️Davlatimiz rahbari Shavkat Mirziyoyevning 24-fevral kuni yoshlar bilan o'tkazgan ochiq va samimiy uchrashuvi mamlakatimizning kelajagi, yosh avlodni qo'llab-quvvatlash va ularning imkoniyatlarini kengaytirishga qaratilgan mutlaqo yangi bosqichni boshlab berayotgan tarixiy voqea bo‘ldi desak mubolag‘a bo‘lmaydi. Ushbu tadbirda ko'tarilgan masalalar, yoshlarimizning ta’lim, ijodiy va sportdagi yutuqlaridan tortib, ularni tadbirkorlikka jalb qilishgacha bo'lgan keng ko'lamli tashabbuslarni o'z ichiga oladi.

➡️Bugungi kunda yurtimizda 22 milliondan ortiq yoshlar bor. Bu – ulkan iqtisodiy, ijtimoiy va siyosiy kuchdir. Zeroki, yoshlarga qaratilayotgan har bir tashabbus — bu mamlakat kelajagiga qilingan strategik investitsiyadir. Prezidentimiz ta’biri bilan aytganda, biror bir yoshimiz davlat e’tiboridan chetda qolmasligi kerak. Shuning uchun yoshlarni kasb-hunarga o‘rgatish, tadbirkorlikka jalb etish, sportga qiziqtirish, ijodkorlik va ijtimoiy faoliyatlarini qo‘llab-quvvatlash bo‘yicha keng ko‘lamli chora-tadbirlar amalga oshirilmoqda. 

➡️ Yurtimiz yoshlarining turli sohalarda erishayotgan yutuqlari bunga yaqqol misoldir. Xususan, so‘nggi yillarda xalqaro sport musobaqalarida 700 dan ortiq oltin, 600 dan ortiq kumush, 800 dan ziyod bronza medallarining qo‘lga kiritilgani O‘zbekistonning jahon maydonidagi obro‘sini yanada oshirmoqda. Bugungi kunda mamlakatimiz aholisi orasida ommaviy sport bilan shug‘ullanuvchilar soni 15 million nafardan oshgani ham bu yo‘nalishdagi ishlar samaradorligini ko‘rsatadi.
 
➡️Davlatimiz rahbari tomonidan e’tirof etilgan ushbu yutuqlarga erishishgan sportchilar qatorida O‘zbekiston davlat jismoniy tarbiya va sport universiteti talabalarining ham borligi, birgina 2025-yilda bo‘lib o‘tgan XXXII Butunjahon yozgi Universiada o‘yinlarida talabalarimiz Taxmina Ikromova, Najmiddin Qosimhojiyev, Sharifa Davronova, Shohjahon Karimboyev, Marat Mavlonov, Shamsiddin Qurbonov delegatsiyamiz hisobiga 4 ta oltin, 3 ta kumush va 2 ta bronza medallarini qo‘shib qo‘ygani, yoki tariximixda ilk bor jahon chempionatiga yo‘llanma olgan futbol terma jamoamiz safida munosib ishtirok etib kelayotgan, dunyo tan olgan Abduqodir Husanov, Abbosbek Fayzullayev, Farrux Sayfiyev kabi mahoratli futbolchilarni yetishtirib kelayotgani faxr tuyg‘usini uyg‘otishi bilan birga, kelgusidagi xalqaro musobaqalar va jahon birinchiliklarida ishtirok etadigan yuqori malakali sportchilarni tayyorlash, ularni saralash (seleksiya), natijadorlikni oshirish hamda ilmiy-uslubiy va psixologik jihatdan qo‘llab-quvvatlash borasida universitetimiz oldiga qator dolzarb vazifalarni ham qo‘yadi.

➡️Zero, zamonaviy sport faqat jismoniy tayyorgarlik bilangina emas, balki ilmiy yondashuv, innovatsion texnologiyalar, sport psixologiyasi va tahliliy metodlar asosida tizimli faoliyat yuritishni talab etadi. Shu bois universitetimiz zimmasiga yuklatilgan mas’uliyat yanada ortib, milliy sport taraqqiyotining muhim ilmiy-amaliy tayanchiga aylanish vazifasi dolzarb ahamiyat kasb etmoqda.

➡️Shuningdek, Prezidentimiz tomonidan ilgari surilgan “Kelajak tadbirkori”, “Yangi avlod tadbirkorlari”, “Yoshlar biznes inkubatori”, “UPSHIFT” kabi dasturlar yoshlarimizning iqtisodiy va ijodiy faolligini oshirishga xizmat qilmoqda. Ayniqsa, “Kelajak tadbirkori” dasturi orqali 7 yil muddatga 15 foizli kreditlar berilishi yoshlar uchun katta imkoniyat, ularga o‘z biznes g‘oyalarini ro‘yobga chiqarish uchun mustahkam poydevor yaratadi.

➡️Ta’lim muassasalari, jumladan, O‘zbekiston davlat jismoniy tarbiya va sport universiteti ham ushbu tashabbuslarning ijrosini ta’minlashni o‘zining eng ustuvor vazifalaridan biri sifatida belgilab olgan. Biz yoshlarni yanada sifatli ta’lim bilan qamrab olish, ularni xalqaro mezonlarga mos kadr sifatida tayyorlash, innovatsion g‘oyalarni qo‘llab-quvvatlash ustida tinimsiz ishlaymiz.

➡️Yoshlarni ijtimoiy faoliyatga jalb etish, volontyorlikni rivojlantirish, ularning fikr va tashabbuslarini qadrlash – bugungi kun talabi. Chunki yoshlarimizning kelajagi — bu, avvalo, bizning kelajagimizdir.

➡️Xulosa o‘rnida aytadigan bo‘lsam, Prezidentimizning ushbu uchrashuvi yana bir bor davlat tomonidan yoshlarga bo‘lgan yuksak e’tibor va ishonchning amaliy tasdig‘idir. Biz, universitet jamoasi, yoshlarning ovozini eshitishga, ularni qo‘llab-quvvatlashga va ularning har bir tashabbusini ro‘yobga chiqarish uchun barcha imkoniyatlarni safarbar etishga doimo tayyormiz.

➡️Aziz yoshlar, ayni paytda, sizlarga yaratilayotgan imkoniyatlar ulkan bo‘lishi bilan birga, ulardan ongli va mas’uliyatli foydalanishni ham talab etadi. Har bir talaba o‘z kelajagi uchun javobgar ekanini chuqur his etib, bilimga, kasbga, til o‘rganishga, tadbirkorlik va ijtimoiy faollikka intilishi zarur. Zero, imkoniyat — bu tayyor natija emas, balki mehnat va intilish orqali muvaffaqiyatga erishish yo‘lidir.

➡️Hurmatli talabalar sizlarning bilimli, faol, ma’naviy yetuk bo‘lib voyaga yetishingiz – yurtimiz ravnaqining eng muhim garovidir. Keling, birgalikda yurtimiz kelajagini yanada porloq qilaylik!

R.Matkarimov – O‘zbekiston davlat jismoniy tarbiya va sport universiteti rektori, professor