Osiyo gandbol federatsiyasining tajribali mutaxassisi ishtirokida ilmiy seminar bo‘lib o‘tdi

#ilmiy_seminar

Shu kunlarda poytaxtimizda Osiyo gandbol federatsiyasi tasarrufida qit’a hakamlarining kursi bo‘lib o‘tmoqda. Mazkur kurs jarayonlari federatsiyaning taniqli va tajribali mutaxassisi, hakamlar qo‘mitasi raisi janob Saleh Bin Ashur tomonidan olib borilmoqda.

Bugun, 24-may kuni O‘zbekiston davlat jismoniy tarbiya va sport universitetida Janob Saleh Bin Ashur ishtirokida ilmiy seminar tashkil etilib, unda oliygohimizning birinchi prorektori Sherzod Mirzanov, Gandbol, regbi, chim ustida xokkey nazariyasi va uslubiyati kafedrasi mudiri, professor-o‘qituvchilar, gandbol ixtisosligi talabalari, shuningdek, O‘zbekiston, Quvayt, Yaponiya, Eron, Xitoy, Ummon va Hindiston davlatlarining 20 nafardan ziyod kurs tinglovchilari ishtirok etdi.

Seminar davomida mutaxassis gandbol sport turida qo‘llaniladigan qoidalari, hakamlik faoliyati, o‘yin jarayonlarini baholab borish hamda mazkur sport turidagi so‘nggi yangiliklar bo‘yicha taqdimot qilib, ishtirokchilar tomonidan yo‘llangan savollarga batafsil javob qaytardi.