Bugun O‘zbekiston davlat jismoniy tarbiya va sport universitetida Chirchiq oliy tank qo‘mondonlik-muhandislik bilim yurti hamda universitetning Sport psixologiyasi va pedagogika kafedrasi bilan hamkorlikda “Ajdodlar merosi – maʼrifat ziyosi” mavzusida maʼnaviy-maʼrifiy tadbir o‘tkazildi.
Unda taniqli adabiyotshunos va shoirlar, bilim yurti kursantlari, universitet rahbariyati, professor-o‘qituvchilar hamda talabalar ishtirok etishdi.
Tadbir davomida so‘zga chiqqanlar ajdodlarimizdan qolgan boy maʼnaviy merosni, bunyodkorlik g‘oyalari va ezgu taʼlimotlarni yoshlar ongiga singdirish, ularni pok imon-eʼtiqod, Vatanga sadoqat, olijanoblik ruhida tarbiyalash borasida o‘z fikr-mulohazalarini bildirib o‘tishdi. Shuningdek, tadbirning badiiy qismida kursantlar tomonidan ijro etilgan “Adolat Sohibqironi” nomli sahna ko‘rinishi va o‘qilgan ifodali sheʼrlar ham yig‘ilganlar eʼtiboridan chetda qolmadi.