Kecha, 5 dekabr kuni Chirchiq shahrida joylashgan O‘zbekiston davlat jismoniy tarbiya va sport universitetining manejida voleybol bo‘yicha "S" ligasining respublika final bosqichiga start berildi.
O‘zbekiston Respublikasi Prezidentining 2022 yil 19- yanvardagi "Mahallalarda yoshlar bilan ishlash tizimini tubdan takomillashtirish chora-tadbirlari to‘g‘risida"gi PQ-92-sonli hamda 2022 yil 11 apreldagi "Mahallalarda yoshlarni ommaviy sportga jalb qilishni yangi bosqichga olib chiqish chora-tadbirlari to‘g‘risida"gi PQ-201-sonli qarori ijrosini taʼminlash va aholi orasida, ayniqsa, yoshlar o‘rtasida jismoniy tarbiya va sportni keng ommalashtirish maqsadida tashkil etilayotgan "Besh tashabbus olimpiadasi" doirasidagi voleybol bo‘yicha o‘g‘il bolalar o‘rtasidagi mazkur respublika finalida Qoraqalpog‘iston Respublikasi, Toshkent shahri va barcha viloyatlardan 280 nafar sportchilar jam bo‘lishdi.
O‘zbekiston Respublikasi sportni rivojlantirish vazirligi, O‘zbekiston Respublikasi Yoshlar ishlari agentligi, Toshkent viloyati hokimligi, Toshkent viloyati sportni rivojlantirish bosh boshqarmasi hamkorligidagi ushbu musobaqaning dastlab tantanali ochilish marosimi tashkil etildi. Marosimda ishtirok etgan O‘zbekiston Respublikasi Sportni rivojlantirish vaziri maslahatchisi Avaz Karimov hamda O‘zDJTSU rektori Maxmudjon Boltaboyevlar jamoalarni final bosqichiga yetib kelgani bilan qutlab, ularga bellashuvlarda yuqori o‘rinlarni egallashida omad tiladi.
Ayni paytda 16 yoshdan 30 yoshgacha bo‘lgan jamoalar o‘rtasidagi "S" ligasi bellashuvlar ko‘tarinki ruhda o‘tmoqda. Musobaqa 8 dekabrga qadar davom etadi.
Ilhom RAHMONOV tayyorladi