SUV SPORTI, ESHKAK ESHISH TURLARI NAZARIYASI VA USLUBIYATI KAFEDRASI

KAFEDRA TARIXI

     Kafedra turli yillarda “Suv sporti va dengiz ko`pkurashi”, “Suzish va eshkak eshish”, “Suzish, eshkak eshish va sinxron suzish nazariyasi va uslubiyati” deb ham nomlangan.“Suv sporti, eshkak eshish turlari nazariyasi va uslubiyati” kafedrasida birinchi bo`lib V. F. Malixin (1956-1957 yillarda) kafedra mudiri lavozimida ishlagan. Keyinchalik V. N. Mixaylov (1957-1960 yillar), p.f.n., dotsent L. Z. Goroxovskiy (1961-1969 yillar), O`zbekistonda xizmat ko`rsatgan murabbiy L. A. Filko (1969-1971 yillar), b.f.n., professor A. N. Livitskiy (1972-1985 yillar), p.f.n., dotsent S. P. Konov (1986-1987 yillar), O. A. Sobirova (1987-1998 yillar), E. M. Muminov (1998-1999 yillar), F. T. Ikramov (1999-2004 yillar), professor V. M. Korbut (2004-2018 yillar), 2018 yildan X. Y. Matnazarov kafedra mudiri lavozimida ishlab kelmoqda.

     Kafedra tashkil topgan davrda suzish, suvga sakrash va suv polosi bo`yicha mashg`ulotlar olib borildi. Keyinchalik kafedraga yangi fanlar tadbiq qilindi. 1976 yilda eshkak eshish ixtisosligi ochildi, 1990 yil dengiz ko`pkurashi ixtisosligi ochilib, 1996 yilda yopildi.Kafedra tashkil topgandan buyon suv sporti bo’yicha 2000 dan ortiq, eshkak eshish ixtisosligi bo’yicha 600 dan ortiq mutaxassislar tayyorlandi. Hozirgi kunda kafedra tasarrufida 25 metrli yopiq, 50 metrli ochiq va yosh bolalarni suzishga o’rgatishga mo’ljallangan kichik hajmli suv havzalari mavjud.

    Kafedra bitiruvchilaridan 4 nafari “O’zbekistonda Xizmat ko’rsatgan sportchi” unvoniga sazovor bo’lgan. Kafedra bitiruvchisi Vadim Menkov “Fidokorona xizmatlari uchun” Ordeni bilan taqdirlangan. “Shuhrat” medali bilan kafedra bitiruvchilaridan I.Kireev, R.Navrzaliyev, S.Mirbekov, G.Kochnev taqdirlangan. Kafedra professor o’qituvchilari tomonidan 5 ta darslik, 40 dan ortiq o’quv qo’llanmalar, 280 dan ortiq uslubiy qo’llanmalar, 700 dan ortiq ilmiy maqolalar chop etilgan.