Yoshlar bilan ishlashning yangicha tizimi yaratilmoqda!

Xabaringiz bor, joriy yilning 11 aprel kuni Prezident Shavkat Mirziyoyev raisligida yoshlar siyosati sohasidagi ishlar natijadorligini oshirish hamda ular bilan ishlash tizimini yana-da takomillashtirish chora-tadbirlari yuzasidan videoselektor yig‘ilishi o‘tkazilgan edi.

Yig‘ilish davomida davlat rahbari tomonidan 14 yoshdan 30 yoshgacha bo‘lgan yoshlarning ijtimoiy ahvoli va qiziqishlari o‘rganib chiqilishi, ayniqsa, nogironligi va surunkali kasalligi bo‘lgan yoshlar bilan manzilli, aniq mezonlar asosida ishlash taʼkidlanib, ularni barcha vazirlik, tashkilot, viloyat, tuman hamda shahar hokimliklari va oliygoh rektorlariga biriktirilishi belgilangan edi.

Mana shu ustuvor vazifalar ijrosini taʼminlash maqsadida kuni kecha O‘zbekiston davlat jismoniy tarbiya va sport universitetida Qibray tumanida istiqomat qiluvchi surunkali kasalligi bor ikki nafar maktab o‘quvchilariga oliygoh hududidagi suzish havzasidan haftada uch kun bepul foydalanish bo‘yicha universitet rahbariyati tomonidan maxsus sertifikatlar topshirildi. Shu bilan birga, ularga suzish formalari tashkil etilishi va murabbiylar biriktirilishi ham alohida qayd etildi.