Joriy yilning 19-sentyabr kuni O‘zbekiston Milliy matbuot markazida “O‘zbekiston davlat jismoniy tarbiya va sport universitetining 2024/2025-o‘quv yilidagi yangiliklar, sport ta’limi sohasidagi islohotlar, Parij-2024 Olimpiya va Paralimpiya o‘yinlarida universitet talaba-sportchilarining, murabbiy va olimlarning roli” mavzusidagi matbuot anjumani bo‘lib o‘tdi.
Unda O‘zbekiston davlat jismoniy tarbiya va sport universiteti rektori Rashid Matkarimov, universitetning O‘quv ishlari bo‘yicha prorektori Eldor Rahmanov, Tashkiliy-nazorat va tahlil boshqarmasi boshlig‘i Hikmat Toshmatov, Jismoniy tarbiya va sport ilmiy taqdiqoqtlar instituti ilmiy xodimlari, professor-o‘qituvchilar hamda OAVlari vakillari ishtirok etishdi.
Ma’lumki, O‘zbekiston davlat jismoniy tarbiya va sport universiteti Respublikamizdagi OTM lar ichida birinchilardan bo‘lib fevral oyida universitetning amaldagi tashkiliy tuzilmasiga o‘zgartirish va qo‘shimchalar kiritildi hamda mavjud 7 ta fakultet faoliyati tugatildi. Mazkur tizim yo‘lga qo‘yilishida sport, ta’lim, ilm-fan, iqtisodiyot va boshqa sohalarda yetakchilik qilayotgan xorijiy davlatlarning ilg‘or tajribalari o‘rganildi. Unga ko‘ra, Pekin sport universiteti (Xitoy), Koreya milliy sport universiteti, Estoniyaning Tartu sport fanlari va fizioterapiya universitetida amalda mavjud bo‘lgan tashkiliy tuzilma asos qilib olindi va respublikadagi davlat oliy ta’lim muassasalari ichida birinchi bo‘lib tajriba tariqasida dekanatlar faoliyati tugatildi. Ta’lim tizimiga kiritigan bunday o‘zgartirish nechog‘lik samarali ekanligini Prezident Shavkat Mirziyoyev raisligida joriy yil 20-iyun kuni muhandislik sohalarida kadrlar tayyorlash va oliy ta’lim muassasalari faoliyatini yanada takomillashtirish masalalari yuzasidan o‘tkazilgan videoselektor yig‘ilishida bildirilgan fikrlar orqali ham bilish qiyin emas, - “Mehnat bozorida talab yo‘q mutaxassisliklar qisqaradi. Ayrim kafedralar birlashtiriladi. Dekanatlarning talabalarga xizmat ko‘rsatish funksiyalari to‘liq raqamlashadi. Xorijdagi kabi “Registrator ofisi” tashkil qilinadi.” Shu asosda universitetdagi mavjud 21 ta ixtisoslik kafedrasining nufuzi oshirildi va ularning vakolatlari kengaytirildi. Dekanatlar faoliyati tugatilishi natijasida o‘quv jarayonini tashkil etishdagi qog‘ozbozlik, buyruqbozlik va inson omili bilan bog‘liq bo‘lgan korrupsion holatlarga chek qo‘yildi. Shuningdek, ta’lim sifatini oshirish, ta’lim jarayonini tez va sifatli tashkil etish hamda uni boshqarish tizimi optimallashtirilib, oliygohda 2024-2025 o‘quv yilidan boshlab talabalarga xizmat ko‘rsatuvchi Ofis registratori xizmatlari boshqarmasi tashkil etildi. Ikkinchidan, talabalarning o‘quv fanlardan referat hamda HEMIS axborot tizimida yakuniy imtihon topshirishi to‘xtatilib, imtihonlar yozma shaklda (muhrlangan daftarda) qabul qilinishi amaliyotga joriy etildi. Uchinchidan, universitet talabalarning muammo va kamchiliklarini o‘rganish, ularni o‘qishi uchun zarur sharoitlar yaratib berish bo‘yicha amaliy ishlar olib borildi. Unga ko‘ra, talabalar turar joyida rektorat shtabi tashkil etildi. Ushbu shtab har kuni soat 18:00dan - 22:00 gacha o‘z faoliyatini olib bormoqda. Shtabning asosiy maqsadi talabalarning o‘qish va yashashi bilan bog‘liq muammolarini o‘rganib, ularni tezkor hal etishdan iboratdir. Ayni vaqtda universitetda 3 ta TTj mavjud bo‘lib, sig‘imi 2156 o‘ringa mo‘ljallnagan, Yangi 2024-2025 o‘quv yilidan boshlab TTJ va sport inshoatlaridan samarali foydalanish, me’yoriy-axloqiy tartiblarga rioya qilinishini ta’minlash, talabalarga qulay yashash va sport bilan shugullanishlari uchun sharoitlarni yaratish, ommaviy sport tadbirlarini tashkil etish, ijtimoiy ahamiyatga ega bo‘lgan jismoniy tarbiya va sport sohasida xizmatlar ko‘rsatish bo‘yicha tijorat faoliyatini amalga oshirish, universitet talabalari va xodimlari uchun sport-soglomlashtirish infratuzilmasidan samarali foydalanish darajasini oshirish maqsadida Talabalar turar joyi va sport inshoatlarini boshqarish direksiyasi tashkil etildi.
Ma’naviy-ma’rifiy yo‘nalishdagi islohotlar va erishilgan yutuqlar: universitet talabalari 2024-yil davomida ko‘plab yutuqlarga erishdi. Xususan, joriy yilda Rossiyaning Qozon shahrida bo‘lib o‘tgan VI BRIKS o‘yinlarida O‘zbekiston delegatsiyasi 17 ta oltin, 39 ta kumush va 58 ta bronza, jami 114 ta medal jamg‘arib, umumjamoa hisobida to‘rtinchi o‘rinni egalladi. Ahamiyatlisi, ushbu xalqaro sport festivalida oliygohning 49 nafar talabalari ham munosib ishtirok etib, 2 ta oltin, 10 ta kumush va 17 ta bronza medalini qo‘lga kiritdi. Fransiya poytaxti Parij shahrida bo‘lib o‘tgan 33-yozgi Olimpiya o‘yinlarida O‘zbekiston delegatsiyasi 8 ta oltin, 2 ta kumush, 3 ta bronza medalni qo‘lga kiritib, Mamlakatimiz ishtirokchi davlatlar orasida umumjamoa hisobida 13-o‘rinni, Osiyo qit’asida 4-o‘rinni, turkiy va islom mamlakatlari hamda Mustaqil Davlatlar Hamdo‘stligi bo‘yicha 1-o‘rinni egalladi. Universitet uchun faxr hisini uyg‘otuvchi yana bir jihat aynan mazkur yozgi Olimpiaya o‘yinlarida chempion bo‘lgan sportchilar shu dargohning sobiq hamda hozirda tahsil olayotgan talabalaridir. Shu o‘rinda aytish joizki, futbol bo‘yicha tarixda ilk bor Olimpiyada o‘yinlariga yo‘llanmani qo‘lga kiritgan O‘zbekiston olimpiya terma jamosi a’zolarining 9 nafari universitet talabalari hisoblanadi. Shuningdek, ushbu Olimpiada o‘yinlarida yurtimiz vakillari tomonidan bir qator rekord natijalarni qo‘lga kiritildi. Ana shu rekordlardan biri universitetning sobiq talabasi, dzyudochi qizimiz Diyora Keldiyorova tomonidan zabt etildi. U Olimpiya o‘yinlari tarixida o‘zbekistonlik ayollar o‘rtasida birinchi marta oltin medalni qo‘lga kiritdi. Boks bo‘yicha milliy terma jamoamiz oltin medallar soni bo‘yicha mamlakatimiz tarixida Olimpiya o‘yinlari rekordini yangiladi va umumjamoa hisobida 1-o‘rinni egalladi. Erkaklar o‘rtasida yettita oltin medalning beshtasini yoki 71 foizini bizning bokschilarimiz qo‘lga kiritdilar. Ularning safida Bahodir Jalolov, Abdumalik Xalokov, Asadxo‘ja Mo‘ydinxo‘jayev aynan O‘zbekiston davlat jismoniy tarbiya va sport universitetida tahsil olgan faxrli talabalardir. Undan tashqari 28-avgustdan 8-sentyabr kunlari bo‘lib o‘tgan XVII yozgi Paralimpiya o‘yinlarida O‘zbekiston delegatsiyasi 10 ta oltin, 9 ta kumush va 7 ta bronza, jami 26 ta medalga sazovor bo‘ldi. Bu bilan paralimpiyachilar medallar jamg‘arish bo‘yicha o‘z tarixidagi eng yaxshi natijani qayd etib, 168 ta davlat ichida umumjamoa hisobida 13-o‘rinni egalladi. Ushbu natija bilan O‘zbekiston Osiyo mamlakatlari orasida Xitoy va Yaponiyadan keyin uchinchi o‘ringa, Markaziy Osiyo mamlakatlari orasida eng yaxshi ko‘rsatkichga ega bo‘ldi. Ushbu o‘yinlarda universitetimizning 3-nafar talabasi ishtirok etdi. Universitet talabalari:
1. RUSTAMOVA Irodaxon Iqboljon qizi- para kanoye
2. XALIMOV Ilxom Norqulovich — para pauyerlifting
3.TO‘RAYEVA Durdona Ilxom qizi- para pauyerlifting.
Shuningdek, universitet bitiruvchisi, Paralimpiya o‘yinlari chempioni, Tolibboy Yo‘ldoshev F37 klassida disk uloqtirish dasturida 57.28 metr natija qayd etgan holda oltin medalni yadro uloqtirish dasturida 15.24 metr natija qayd etib, bronza medalini qo‘lga kiritdi.
Universitet sport klubi faoliyati qayta ko‘rib chiqildi: Universitetda yil boshidan buyon amalga oshirilgan eng katta o‘zgarishlardan biri Sport klubi faoliyatini takomillashtirish va uni moliyalashtirish tizimi qayta ko‘rib chiqildi. 2024-yil uchun ommaviy sport tadbirlarni tashkil etish hamda sport klubini saqlash uchun to‘lov-kontrakt mablag‘lari hisobidan 1,5 mlrd so‘m mablag‘ ajratildi. Buning natijasida esa oliy ta’lim mussasasi respublika va xalqaro musobaqalarga mezbonlik qila boshladi. Xususan, o‘tgan davr mobaynida Sport klubi tomonidan 20 ga yaqin kafedralarning sport turlari bo‘yicha ichki ochiq birinchiligi va Universitet chempionatlari tashkil etilib, unda 2000 ga yaqin talabalar ishtirok etishdi. Undan tashqari 1 ta Respublika hamda 2 ta Xalqaro turnirlar o‘kazildi va unda 500 dan ortiq sportchilar qatnashdi.
Xalqaro aloqalar: O‘zbekiston davlat jismoniy tarbiya va sport universitetida so‘nggi vaqtlarda oliygohning barqaror rivojlanishi, o‘quv jarayoniga xalqaro ta’lim standartlariga asoslangan ilg‘or pedagogik texnologiyalar, o‘quv dasturlari va o‘quv-uslubiy materiallarni keng joriy qilish maqsadida xorijdan bir qator mutaxassislar jalb etib kelinmoqda. Xususan, Xitoy Xalq Respublikasidan jalb qilingan Pekin sport universiteti professori Yang Binsheng, Germaniyaning Kyoln sport universiteti professorlari Georgiy hamda Lesya Korobeynikovalar universitetga xorijiy mutaxassis sifatida ishga qabul qilindi. Ularni ishga qabul qilish orqali jismoniy tarbiya va sport sohasidagi ilg‘or xorijiy tajribalar asosida innovatsion faoliyat keng joriy etilib kelinmoqda. Ayni paytda Georgiy va Lesya Korobeynikovalar Universitetning 6 nafar yosh olimiga ilmiy rahbar sifatida biriktirildi. Bundan tashqari Malayziya, Indoneziya, Xitoy, Germaniya va Turkiyaning nufuzli universitetlariga xizmat safarlari uyushtirilib, 7 ta xalqaro universitetlar bilan memorandumlar imzolandi. O‘zDJTSU rektori R.Matkarimov boshchiligidagi delegatsiyaning 2024-yil 12-18-may kunlari Pekin (Xitoy) shahridagi Pekin sport universitetiga xizmat safari, shuningdek, Xitoy Jismoniy tarbiya va sport bosh davlat boshqarmasi direktori Gao Jidan rahbarligidagi Xitoy delegatsiyasining O‘zbekiston davlat jismoniy tarbiya va sport universitetiga tashrifi davomida bir qator muhim kelishuvlarga erishildi. O‘tgan 8 oy mobaynida Xitoy, Koreya, Turkiya, Malayziya, Belarus mamlakatlari va Rossiya Fedratsiyasidan 30 nafarga yaqin xorijiy mehmonlar tashrif buyurdi. Shu bilan birga sohani rivojlantirish bo‘yicha investitsion tashkilotlar hamda Universitet tarixida ilk marotaba Italiya va Ispaniyaning top universitetlari bilan hamkorlik yo’nalishlari kelishib olindi.
Sport ta’limida ilmiy tadqiqot ishlarining borishi: Universitetda jami asosiy shtatda 474 nafar professor-o‘qituvchi faoliyat olib bormoqda. Jami ilmiy daraja va unvonlilar – 182 nafar. Ilmiy salohiyat asosiy shtatdagi professor-o‘qituvchilarga nisbatan 38,3 % ni tashkil etadi. Xalqaro reytingda esa O‘zDJTSU Round University rankings 2024 natijalariga ko‘ra dunyoda 1110-o‘rinni, O‘zbekiston OTMlari orasida 15-o‘rinni egalladi.
Istiqboldagi rejalar: Darhaqiqat istiqbolda rejalar ham ulkan. Avvalo, universitetdagi o‘quv rejalarni sport ta’limi rivojlangan xorijiy oliy ta’lim muassasalarining o‘quv rejalari asosida takomillashtirish. Hozirda mas’ullarimiz Xitoy xalq Respublikasining Pekin va Shandon universitetlaridagi o‘quv rejalarini ijodiy yondoshgan holda izchil tahlil qilib, universitet o‘quv rejasini takomillashtirishga harakat qilmoqda. Bunda asosiy urg‘u mutaxassislik fanlarini amaliyot bilan uyg‘un holda chuqur o‘zlashtirishga e’tibor qaratilmoqda. Ikkinchidan, universitetni moliyalashtirish tizimi, to‘g‘rirog‘i rivojlangan sport ta’limi tashkilotlaridan xorijiy investitsiya jalb qilish borasida dastur tayyorlanmoqda. Uchinchidan, xorijiy nufuzli sport ta’limi muassasalarida tahsil olayotgan yosh mutahassislarni universitetga jalb qilish, bundan tashqari bir guruh mutasaddilar o‘quv jarayonlarini raqamlashtirish borasida ham faoliyat olib bormoqda. Oliy ta’lim muassasasining 2 ta kirish joylarini yangi qiyofaga keltirish, nazorat uskunalari o‘rnatish bo‘yicha loyiha ishlari ko‘rib chiqilmoqda. Shuningdek, universitet hududida regbi maydoni barpo etish, kanal bo‘yida eshkak eshish bazasini tashkil qilish yuzasidan ham zaruriy chora-tadbirlar ko‘rilmoqda.