Paralimpiya sport turlarini rivojlantirish bo‘yicha xalqaro hamkorlik o‘rnatildi!

#xalqaro_hamkorlik

Bugun O‘zbekiston davlat jismoniy tarbiya va sport universitetida Yaponiyaning jismoniy imkoniyati cheklanganlarni aravachada harakatlanishga o‘rgatuvchi mutaxassislar uyushmasi, ko-innovatsiya laboratoriyasi direktori Daisuke Hashimoto va Yaponiya sport kengashining “Sport for Tomorrow” (kelajak uchun sport) loyihasi direktori Kazuhiko Ito hamda universitet rektori Rashid Matkarimov, Jismoniy tarbiya va sport ilmiy tadqiqotlar instituti direktori Mexriddin Mirjamalovlar o‘rtasida uchrashuv bo‘lib o‘tdi.

Uchrashuv davomida paralimpiya sport turlariga tayyorlash, imkoniyati cheklangan sportchi talabalar bilan faoliyat olib boruvchi professor-o‘qituvchilar malakasini oshirish va ushbu sohada ilmiy tadqiqotlarni rivojlantirish bo‘yicha xalqaro hamkorlikni yo‘lga qo‘yish masalalari muhokama qilindi. Shundan so‘ng mazkur xorijiy tashkilotlar bilan O‘zbekiston davlat jismoniy tarbiya va sport universiteti hamda Jismoniy tarbiya va sport ilmiy tadqiqotlar institutlari o‘rtasida o‘zaro anglashuv memorandumlari imzolandi.

Shuningdek, xorijiy mutaxassislar universitetning Adaptiv jismoniy tarbiya va parasport kafedrasi talabalari, professor-o‘qituvchilari uchun sport orqali imkoniyati cheklangan insonlarning ijtimoiy ishtirokini oshirish, qo‘rquv va xavotirni yengish, kabi mavzularda maʼruzalar qilib, “Samspel” va “Takkyu Volley” inklyuziv sport turlari bo‘yicha amaliy mashg‘ulotlar o‘tkazishdi.

Yakunida esa yaponiyalik mutaxassislar tomonidan kafedraga “Samspel” va “Takkyu Volley” o‘yinlarini rivojlantirish maqsadida ikkitadan maxsus jihozlar sovg‘a qilindi.