O'zDJTSU: seminar tinglovchilari va universitet rahbariyati o'rtasida uchrashuv bo'lib o'tdi

#o‘quv_seminar
#uchrashuv

Xabaringiz bor, O‘zbekiston davlat jismoniy tarbiya va sport universitetida joriy yilning 4-dekabr sanasidan boshlab Olimpiya va paralimpiya sport turlariga tayyorlash markazlari, Olimpiya va milliy sport turlari bo‘yicha davlat ixtisoslashtirilgan maktab-internatlari hamda sport mahorati maktablarining ma’naviy-ma’rifiy ishlari bo‘yicha direktor o‘rinbosarlari uchun o‘quv-amaliy seminar o‘tkazilmoqda.

Bugun, 5-dekabr kuni universitet rektori Rashid Matkarimov, O‘zbekiston Respublikasi Sport vazirligi Oliy va professional ta’lim muassasalari bilan ishlash bo‘limi boshlig‘i Farxod Turdiyev, prorektorlar, Jismoniy tarbiya va sport ilmiy tadqiqotlar instituti vakillari kafedra-mudirlari, bo'lim rahbarlari hamda o‘quv-amaliy seminar tinglovchilari o‘rtasida uchrashuv bo‘lib o‘tdi.

Dastlab, oliygoh rektori tinglovchilarga universitet faoliyati haqida qisqacha ma’lumot berib o‘tdi. Shundan so‘ng bugungi kunda oliy ta’lim muassasasidagi mavjud ixtisoslik kafedralari va turli sport tashkilotlari, mahorat maktablari hamda markazlar bilan o‘rnatilgan hamkorlik aloqalari asosida yo‘lga qo‘yilgan dual ta’lim tizimini yanada rivojlantirish, sport turlari bo‘yicha musobaqalarni yuqori saviyada tashkil etib, iqtidorli sportchilarni saralab olish va ular bilan doimiy ishlash yuzasidan fikrlar bildirildi.

Shuningdek, uchrashuvda seminar tinglovchilari oliygoh haqida ko‘proq ma’lumotga ega bo‘lishlari uchun universitetda o‘quv yili davomida qilingan amaliy ishlarga bag‘ishlangan videorolik namoyish etildi.