“V Butunjahon ko‘chmanchilar o‘yinlari”dagi medallarimiz soni 32taga yetdi

Ostona shahrida davom etayotgan “V Butunjahon ko‘chmanchilar o‘yinlari”ning ortda qolgan bellashuvlari sarhisobiga ko‘ra, mamlakatimiz vakillari 11 ta oltin, 12 ta kumush, 9 ta bronza, jami 32 ta medal bilan umum jamoada 2-o‘rinda bormoqda.

Kecha o‘tkazilgan kurash musobaqalarida sportchilar– 60, -66, -73 va kurashchi qizlar -57 kilogramm vazn toifasida g‘oliblik uchun bellashdi.

 50 nafardan ortiq kurashchilar ishtirok etgan bellashuvlar keskin va murosasiz o‘tdi. Ayollar o‘rtasida mezbon mamlakat vakili To‘lganay Abeuova g‘oliblik shoxsupasiga ko‘tarildi.

Mahoratli sportchilarimiz Murodil Murodilloyev, Otabek Xasanov, Jamshid Yo‘ldoshev o‘z vaznlarida oltin medal sohibi bo‘ldi. “V Butunjahon ko‘chmanchilar o‘yinlari”ning teatrlashtirilgan etno sport tadbirlari keng maydonda davom etmoqda.

Eslatib o‘tamiz, an’ana tusini olayotgan Butunjahon ko‘chmanchilar o‘yinlarining bu galgi tadbirlarida  89 ta mamlakatning 2 ming 800 nafarga yaqin sportchilari qatnashmoqda. O‘yinlar 13 sentyabrgacha davom etadi.