Dzyudo: Jahon chempionatining yakkalik bahslarida O‘zbekiston tengsiz!

Poytaxtimizdagi "Yunusobod" sport majmuasida davom etayotgan dzyudo bo‘yicha harbiylar o‘rtasidagi Jahon chempionatining yakkalik bellashuvlari yakunlarida 13 ta medalga ega chiqqan hamyurtlarimiz dunyoga O‘zbek sportining kuch-qudratini namoyish etdi.

42-jahon chempionatining ikkinchi kungi shiddatli bellashuvlarida mamlakatimiz dzyudochilari 3 ta oltin, 2 ta kumush medalni qo‘lga kiritdi. Xususan, jahon chempionatining -81 kilogramm vazn toifasi finalida Hikmatulloh To‘rayev Muso Sobirovni mag‘lubiyatga uchratib, chempionlik shohsupasiga ko‘tarildi. Sobirov kumush medalga sazovor bo‘ldi. Xuddi shuningdek, Rustam Shorahmatov (-100 kg) va Shohruh Baxtiyorov (+100 kg) ham o‘z vaznlarida harbiylar o‘rtasida jahon chempioni bo‘lishdi. Terma jamoamiz a’zolaridan Irisxon Qurbonboyeva (+78 kg) esa kumush medalga ega chiqdi. Bronza medali uchun tatamiga chiqqan Shirinjon Yo‘ldosheva (-70 kg), Mushtariybegim Afzalova (-78 kg) va Bekmurod Oltiboyev (+100 kg) raqiblariga imkoniyatni boy berib qo‘yishdi.

Chempionatning ikki kunlik bellashuvlari sarhisobiga ko‘ra, O‘zbekiston terma jamoasi harbiylar o‘rtasidagi 42-jahon chempionatida 5 ta oltin, 5 ta kumush, 3 ta bronza medaliga egalik qilgan holda, O‘zbekiston sportining shijoatini namoyish etdi. Bugun, 18-oktyabr kuni jahon chempionatining so‘nggi kunida aralash jamoaviy bahslarda g‘olib va sovrindor jamoalar nomi aniqlanadi.