Shaxmat: Abdusattorov “WR Chess Masters-2024”ning 1/4 bosqichiga ko‘tarildi!

Buyuk Britaniyaning London shahrida shaxmat bo‘yicha boshlangan “WR Chess Masters-2024” turnirining bu yilgi musobaqalarida dunyoning 16 nafar mahoratli grossmeysteri qatorida hamyurtlarimiz Nodirbek Abdusattorov va Javohir Sindarov ham g‘oliblik uchun kurash olib borishmoqda.

Kecha, 14-oktabr kuni musobaqaning 1/16 final bahslari bo‘lib o‘tdi. Ilk bosqichda Nodirbek Abdusattorov ayollar o‘rtasida 12-Jahon chempioni hozirda Shveysariya sharafini himoya qilayotgan Aleksandra Kostenyuk bilan ro‘baro‘ keldi. Teng kurashlar ostida o‘tgan o‘yinda Abdusattorov kichik ustunlik evaziga turnirning1/4 bosqichiga yo‘l oldi Ushbu bosqichda Javohir Sindarov fransiyalik Maksim Vashe-Lagrav bilan kuch sinashdi. O‘tkazilgan 2 ta partiyada durang natija qayd etilgan bo‘lsa, 1 partiyada Sindorov imkoniyatni boy berib qo‘ydi. Bu esa fransiyalik Vashe-Lagravni keyingi bosqichga olib chiqdi.

Shuningdek qolgan juftliklar qarama-qarshiligidagi o‘yinlarda hindistonlik Erigaisi Arjun, Gudjarat Vidit, Anand Vishvanatan, Rameshbabu Praggnanandha, Raunak Sadvani, Fransiya sharafini himoya qilayotgan Alireza Firuzja g‘olib chiqqan holda keyingi bosqichda kurashni davom ettiradigan bo‘ldi.

Bugun, 15-oktabr kuni “WR Chess Masters-2024” turnirining 1/4 bosqichidagi bahsda Nodirbek Abdusattorov fransiyalik Maksim Vashe-Lagrav bilan bahs olib borsa, Erigaisi Arjun-Gudjarat Vidit, Vishvanatan Anand-Rameshbabu Praggnanandha, Alireza Firuzja- Raunak Sadvani o‘z omadini sinovdan o‘tkazadi.

Eslatib o‘tamiz, mukofot jamg‘armasi 58 ming yevrodan iborat “WR Chess Masters-2024” tuniri 18-oktabrga qadar davom etadi.