O‘zDJTSU: Pendidikan Sultan Idris universiteti bilan o‘rnatilgan hamkorlik aloqalari amalda   

#tashrif

Bugun O‘zbekiston davlat jismoniy tarbiya va sport universitetiga Malayziya Pendidikan Sultan Idris universitetining Sport fanlari va murabbiylik fakulteti dekani Jaffry Zakaria boshchiligidagi delegatsiya tashrif buyurdi.

Tashrif avvalida universitet rektori Rashid Matkarimov boshchiligidagi universitet jamoasi hamda delegatsiya a’zolari o‘rtasida uchrashuv bo‘lib o‘tdi. Uchrashuvda ikki universitet o‘rtasida o‘rnatilgan xalqaro aloqalarini mustahkamlash, kelgusidagi istiqbolli rejalar, jumladan talabalar va professor-o‘qituvchilar almashinuvi, hamkorlik doirasida qo‘shma ta’lim dasturlari va ilmiy konferensiyalar tashkil etish  kabi muhim masalalarga alohida urg‘u berilib, zaruriy tavsiya va takliflar bildirildi.

Shuningdek, tashrif doirasida delegatsiya a’zolari ishtirokida universitet kafedralari kesimida o‘tkaziladigan seminarlar mazmun-mohiyati hamda yo‘nalishlari to‘g‘risida ham fikrlar almashinildi.

Shundan so‘ng faxriy mehmonlar universitet sport inshootlari, o‘quv jarayonlari va ilmiy laboratoriyalar faoliyati bilan yaqindan tanishish maqsadida oliygoh bo‘ylab sayohat qilishdi.

Ma’lumot o‘rnida, Jaffry Zakaria boshchiligidagi delegatsiya universitetimizda 10-noyabrga qadar turli mavzularda seminar-treninglar olib borishadi.