Shaxmat olimpiadasida hayot-mamot janglari boʻlib oʻtmoqda…

#shaxmat_olimpiadasi

Ayni vaqtda 45-Butunjahon shaxmat olimpiadasining 5-turida yigitlarimiz oq donalarda Moldova terma jamoasi bilan kuch sinashmoqda.

Shaxmatchi qizlarimiz boʻlsa, olimpiadaning eng kuchli ayollar jamoasi sifatida eʼtirof etilgan Gruziyaga qarshi dona surishmoqda.

Qayd etish kerakki, 2022-yil Hindistonda oʻtgan olimpiya oʻyinlarining vitse-chempionligiga erishgan Gruziya terma jamoasi tarkibida sakkizta shaxmat olimpiadasi ishtirokchisi va 2015-yilgi jamoalar oʻrtasidagi jahon chempionati gʻolibi Djavaxishvili, toʻrtta olimpiada qatnashchisi, 2017-yilgi jahon chempioni Nana Dzagnidze, Nino Batsiashvili kabi nomdorlarning borligi hamyurtlarimiz uchun ushbu “duel” hayot-mamot jangi boʻlishidan dalolat bermoqda.

Voqealar rivojidan oldinga oʻtib fikr yuritadigan boʻlsak, erkaklar terma jamoamizning bugun FIDE reytingida ham, shaxmatchilarning joylashuvida ham vakillarimizdan ortda joylashgan Moldovaga qarshi bahsi u qadar xavotirli emas. Ammo, “aql jangi”da faqat bilim, tajriba emas omadga ham koʻp narsa bogʻliqligini unutmaslik kerak. Qolaversa, Moldova terma jamoasi vakillari yakkalikda jahon shaxmatida nomdorlar qatorida talqin etilmasa-da, 2022-yilgi olimpiadada 6-oʻrinni egallagan jamoa ekanligini ham esdan chiqarmaslik kerak. Shu maʼnoda, xotirjamlikka berilishga asoslar yoʻq.

Ayollar oʻrtasidagi 5-tur bahslari borasida soʻz yuritilsa, albatta Xitoy-Armaniston, Moʻgʻuliston-AQSH, Qozogʻiston-Hindiston, Vengriya-Estoniya musobaqalari qatori hamyurtlarimizning Gruziya bilan oʻtkazadigan oʻyini hayajon-u shiddatga toʻla boʻlishi shubhasiz.

Natijalar sizga ham qiziqmi? Unda bizni kuzatishda davom eting!