#til_bayrami
Bugun ana shu mavzuda O‘zbekiston davlat jismoniy tarbiya va sport universitetida O‘zbek tiliga davlat tili maqomi berilgan kunning 35 yilligi munosabati bilan O‘zbek va chet tillari kafedrasi tomonidan ma’naviy-ma’rifiy, badiiy-musiqiy tadbir o‘tkazildi.
Unda universitet rahbariyati, professor-o‘qituvchilar, tyutorlar va talabalar ishtirok etishdi.
Universitet Yoshlar masalalari va ma’naviy-ma’rifiy ishlar bo‘yicha birinchi prorektor Sherzod Mirzanovning kirish so‘zi bilan boshlangan tadbirda, til – insoniyat uchun buyuk ne’mat, mislsiz boylik va o‘lmas qadriyat ekanligi to‘g‘risida fikr-mulohazalari bildirilib, o‘zbek tili bugungi kunda AQSh, Buyuk Britaniya, Germaniya, Rossiya, Xitoy, Hindiston, Turkiya va shu kabi bir qator davlatlarning 60 ga yaqin universitetlari hamda 100 dan ziyod maktablarida o‘rganilayotganligi alohida ta’kidlandi.
Shuningdek, tadbir davomida sportchi talaba-yoshlar ishtirokida she’riy chiqishlar, sahna ko‘rinishlari, milliy ruhdagi kuy-qo‘shiqlar va jozibador raqslarning barchasi bayram tadbiriga bir olam zavq bag‘ishladi.
Yakunda ijodiy chiqishlari bilan davlat tili targ‘ibotidagi faolligi uchun bir qator talabalarga tashakkurnomalar topshirildi.
Ma’lumot o‘rnida, dunyoda 5600 dan ortiq tillar mavjud bo‘lib, bundan 200 tasigina davlat tili sifatida qabul qilingan. Ularning orasida o‘zbek tili ham borligi bizga ulkan faxr va iftixor bag‘sh etadi. Eng asosiysi, o‘zbek tili turkiy tillar oilasiga mansub eng yirik tillardan biri bo‘lib, jahon miqyosida bu tilda 50 millionga yaqin odam so‘zlashadi.