Jahon chempioni bilan uchrashuv!

#uchrashuv
 

Bugun, 19-mart kuni O‘zbekiston davlat jismoniy tarbiya va sport universitetida oliygohning sobiq talabasi, 75 kg vazn toifasida isteʼdodli bokschi, Boks boʻyicha Jahon chempionati sovrindori, Osiyo chempioni, Osiyo oʻyinlari gʻolibi, super yarim o‘rta vaznda WBA kamari sohibi,  Isroil Madrimov hamda Boks bo‘yicha O‘zbekiston terma jamoasi bosh murabbiyi, O‘zbekistonda xizmat ko‘rsatgan murabbiy, universitet professori To‘lqin Qilichev  bilan uchrashuv bo‘lib o‘tdi.

Uchrashuv universitet rektori, professor Rashid Matkarimovning kirish so‘zi bilan boshlanib, mamlakatimizda amalga oshirilgan va oshirilayotgan keng qamrovli islohotlar boshqa sohalar singari jismoniy tarbiya va sport tizimida ham yangicha tamoyillarning quloch yoyishiga, muvaffaqiyatlar yuz ochishiga omil bo‘layotgani, shaxsan prezidentimiz tashabbusi bilan yangi-yangi sport inshootlari, mahorat maktablari tashkil etilayotgani, ushbu islohotlar samarasi o‘laroq, yurtimiz sportchilari jahon arenalarini zabt etayotgani xususida o‘z fikrlarini bildirdi.

So‘zining davomida rektor joriy yil 8-mart kuni Saudiya Arabistonining Ar-Riyod shahridagi “Kingdom Arena” majmuasida bo‘lib o‘tgan professional boks kechasida munosib ishtirok etib, super yarim o‘rta vaznda WBA kamari uchun rossiyalik chempion Magomed Qurbonovni taslim etgan bokschimiz Isroil Madrimovni chempionlik kamari bilan samimiy qutladi.

Shundan so‘ng O‘zbekiston terma jamoasi bosh murabbiyi, To‘lqin Qilichev so‘zga chiqib, Isroil Madrimov haqida, uning intizomi, mexnatkashligi sabab jahon chempioni bo‘lganini alohida e’tirof etib, o‘zbek boks maktabining dunyoda yetakchiligini saqlab qolish va davom ettirish, yuqori malakali sportchilarni tayyorlash borasida ham so‘z yuritdi.

Isroil Madrimov esa o‘z vaqtida ushbu universitetda tahsil olgani va bundan faxrlanishi, shu bilan birga chempionlik kamari uchun kechgan jangi taassurotlari hamda kelajakda oldiga qo‘ygan maqsadlari haqida gapirib o‘tdi.

Uchrashuv davomida oliygoh rektori va Isroil Madrimov hamrohligida universitetning Adaptiv jismoniy tarbiya va parasport kafedrasi talabasi Qudratjon Toshboyevga nogironlik aravachasi topshirildi.

Yakunda Isroil Madrimovga universitet ramzi tushirilgan esdalik sovg‘asi berilib, unga universitetda ilmiy tadqiqotchi bo‘lish taklifi bildirildi. O‘z navbatida Isroil Madrimov ham chempionlik jangida kiyib tushgan qo‘lqopini universitet muzeyiga sovg‘a qildi.