Jismoniy tarbiya va sport sohasining rivojida xorij tajribasini o‘rganish eng ustuvor vazifalardan biridir!

Ma’lumki, so‘nggi yillarda yurtimizda sport sohasi jadal sur’atlarda rivojlanmoqda. Rivojlanish jarayonini yanada jadallashtirish, ko‘zlanayotgan maqsadlarni to‘laqonli amalga oshishida esa chet el tajribasini o‘rganish va sohaga yangi innovatsion texnologiyalarni olib kirish muhim ahamiyatga ega.

Shu maqsadda O‘zbekiston davlat jismoniy tarbiya va sport universiteti, Yakkakurash sport turlari fakulteti dekani, pedagogika fanlari doktori, professor S.Tojiboyev joriy yilning 28-noyabridan 10-dekabriga qadar Vengriya va Ispaniya davlatlarida xorij safarida bo‘lib qaytdi.

Safar davomida universitet vakili Vengriyaning Budapesht shahrida joylashgan Vengriya sport fanlari universiteti (Hungarian University of Sports Science), Ispaniyaning  San Sebastian shahrida joylashgan “SST-Systems” kompaniyasi hamda Barselona shahridagi Kataloniya milliy jismoniy tarbiya instituti (Institut Nacional d'Educació Física de Catalunya) kabi oliygohlarda bo‘lib, u yerdagi jismoniy tarbiya va sport sohasidagi yangiliklar va innovatsion texnologiyalar bilan tanishdi. Shu bilan birga, ular bilan qator kelishuvlarga ham erishildi.

Xususan, Vengriya sport fanlari universiteti va Kataloniya milliy jismoniy tarbiya institutlari bilan sport sohasidagi bilimlarni rivojlantirish, talabalar hamda xodimlar uchun taʼlim va akademik imkoniyatlarni kengaytirish, sohadagi ilmiy tadqiqotlar bo‘yicha o‘zaro manfaatdorlikni ta’minlash, xalqaro hamkorlikni kengaytirish singari muhim masalalar borasida kelgusidagi rejalar belgilab olindi. “SST-Systems” kompaniyasi bilan esa talabalar, professor-o‘qituvchilar va sportchilar almashinuvi, qisqa muddatli intensiv treninglar o‘tkazish, hamkorlikdagi tadqiqot loyihalari, seminarlar, konferentsiyalar va raqamli ta’lim dasturlarini o‘z ichiga olgan qo‘shma tadbirlarni tashkil etish hamda hamkorlikka xizmat qilishi mumkin bo‘lgan mobillik sxemalarida ishtirok etish, masalan, Erasmus + ICM va Ingliz tili bo‘yicha qo‘shma daraja dasturini ishlab chiqish yuzasidan xalqaro hamkorlik Memorandumi imzolandi.