Kuzatuv kengashining navbatdagi yig‘ilishi bo'lib o'tdi  

Bugun Sport vaziri Adham Ikramov rahbarligida Jismoniy tarbiya va sport sohasida kadrlar salohiyatini oshirish hamda ilmiy faoliyatini rivojlantirish boʻyicha Kuzatuv kengashining yigʻilishi oʻtkazildi.

Unda universitet rektori Rashid Matkarimov ham ishtirok etib, yigʻilish davomida oʻtgan davrda amalga oshirilgan ishlar va navbatdagi rejalashtirilgan ayrim dolzarb masalalar koʻrib chiqildi. 

Kun tartibidagi masalalar yuzasidan, eng avval Jismoniy tarbiya universiteti va uning filiallarida abiturientlarning qabul jarayonlarini adolatli, shaffof o‘tkazish, bu borada Universitetning sport faoliyati (faoliyat turlari) bo‘yicha 2024/2025-o‘quv yili uchun ishlab chiqilgan kasbiy (ijodiy) imtixon mezonlarini tegishli sport federatsiyalari mutaxassilarini jalb qilgan holda qayta ko‘rib chiqish bo’yicha mas’ullarga vazifalar berildi.

Ma’lumot uchun: Bugungi kunda, Universitet, uning filialllari hamda Ilmiy tadqiqotlar institutida 2024/2025-o‘quv yili uchun qabul jarayonlari 3 ta bakalavriat va 7 ta magistratura mutaxassisliklari bo‘yicha amalga oshirilishi kutilmoqda.

Shuningdek, Kengash yig‘ilishida Jismoniy tarbiya universitetining 2024-yil uchun shakllantirilgan daromad va xarajatlar parametrlari, Universitet o‘quv-ilmiy jarayonlariga jalb etiladigan xorijiy mutaxassislar mehnatiga haq to‘lash miqdorini belgilash va Olimpiyada o‘yinlariga tayyorgarlik ko‘rayotgan milliy terma jamoa a’zolari bo‘lgan kunduzgi ta’lim asosida o‘qiyotgan talabalarga shaxsiy reja asosida fanlarni o‘zlashtirishini tashkil etish masalalari bo‘yicha mas’ullar hisobotlari eshitildi.