Jismoniy tarbiya va sport taʼlimi: muammolar, istiqbollar, innovatsiyalar

Bugun O‘zbekiston davlat jismoniy tarbiya va sport universitetida “Jismoniy tarbiya va sport taʼlimi: muammolar, istiqbollar, innovatsiyalar” mavzusida Xalqaro ilmiy kongress bo‘lib o‘tdi.

Unda O‘zbekiston Respublikasi Sportni rivojlantirish vazirligi hamda Jismoniy tarbiya va sport ilmiy tadqiqotlar instituti vakillari, mahalliy yosh olimlar, mutaxassislar, oliy o‘quv yurtlari professor-o‘qituvchilari, mustaqil izlanuvchilar, magistrant va talabalar ishtirok etishdi.

Kongress davomida mutaxassislar tomonidan sohadagi muhim yo‘nalishlar bo‘yicha maʼruzalar qilindi. Shuningdek, jismoniy tarbiya va sport sohasida kasbga yo‘naltirilgan taʼlimni tashkil qilishning ilmiy-nazariy asoslari, nomutaxassislik yo‘nalishlarida jismoniy tarbiya va sport taʼlimini tashkil qilishning zamonaviy muammolari, olimpiya va paralimpiya sport musobaqalari natijalari asosida sport taʼlimini rivojlantirish yo‘llari, sog‘om turmush tarzi tamoyillari asosida jismoniy tarbiya va sportni tibbiy-biologik taʼminlashning innovatsion uslublari kabi muhim masalalar yuzasidan ham muhokamalar o‘tkazildi.

Yakunda esa yuqoridagi dolzarb masalalar bo‘yicha ilmiy taklif va amaliy tavsiyalar qabul qilindi hamda kongressda faol ishtirok etgan taqdimotchilarga sertifikatlar topshirildi.