OT SPORTI YoSh TADQIQOTCHILARNIGOHIDA

2021 yil 26 oktyabrda O‘zbekiston yilqichilik va ot sporti federatsiyasi, O‘zbekiston davlat jismoniy tarbiya va sport universiteti hamda Jismoniy tarbiya va sport ilmiy tadqiqotlar instituti o‘rtasida o‘quv mashg‘ulotlari, ilmiy-uslubiy va innovatsion texnologiyalar asosida ot sportini yana-da takomillashtirish bo‘yicha o‘zaro hamkorlik memorandumi imzolangan.

Mazkur Memorandumda belgilangan vazifalardan kelib chiqib, ot sporti turlarining o‘quv-mashg‘ulotlar jarayoniga zamonaviy ilmiy-innovatsion texnologiyalarni joriy qilish, yosh tadqiqotchilarni ot sporti turlari bo‘yicha ilmiy faoliyatga jalb etish bo‘yicha ham amaliy harakatlar olib borilmoqda.

Joriy yilning 4 mart kuni Toshkent shahar Chilonzor tumanida joylashgan markaziy “IPPODROM”da Toshkent shahar Chavandozlar maktabida tarbiyalanayotgan yosh chavandoz-sportchilarning jismoniy rivojlanishi, funksional holati va jismoniy tayyorgarligi bo‘yicha ilmiy-tadqiqot ishlarining yakuniy bosqichi o‘tkazildi.

Ushbu tadqiqot ishlarida O‘zDJTSU Murakkab-texnik sport turlari nazariyasi va uslubiyati kafedrasi o‘qituvchisi Sh.Yoldashov bilan bir qatorda Yoshlar siyosati va sport vazirligi tizimidagi Jismoniy tarbiya va sport ilmiy tadqiqotlar institutining yetakchi olimlari, doktorantlar va mustaqil izlanuvchilar ishtirok etdi.

Tadbir so‘ngida ot sporti bilan shug‘ullanuvchilarning boshlang‘ich tayyorgarlik bosqichida sport mashg‘ulotlarini tashkil etish yuzasidan zarur tavsiyalar va foydali maslahatlar berildi. Shuningdek, kelgusida Chavandozlar maktablari uchun o‘quv adabiyotlarini nashrga tayyorlash va chop etish masalalari muhokama etilib, hamkorlik aloqalarini yana-da kengaytirish yuzasidan kelishuvga erishildi.