Sport - sog‘lom turmush tarzining asosidir

Bugun O‘zbekiston davlat jismoniy tarbiya va sport universitetining “Sport majmuasi”da madaniyat, sport va turizm sohasida mehnat qilayotgan xodimlar o‘rtasida sog‘lom turmush tarzini keng targ‘ib qilish, sport-sog‘lomlashtirish tadbirlari orqali salomatligini tiklashga ko‘maklashish maqsadida “Sport salomatlik garovi” shiori ostida Respublika spartakiadasining ochilish marosimi bo‘lib o‘tdi.

Mazkur spartakiada O‘zbekiston madaniyat, sport va turizm xodimlari kasaba uyushmasi Respublika Kengashi, O‘zbekiston kasaba uyushmalari Federatsiyasi sport sog‘lomlashtirish ishlar boshqarmasi, O‘zbekiston madaniyat vazirligi, O‘zbekiston sport faxriylari uyushmasi, O‘zbekiston davlat jismoniy tarbiya va sport universiteti hamkorligida tshkil etildi.

Unda O‘zbekiston madaniyat sport va turizm xodimlari kasaba uyushmasi tizimidagi korxona, tashkilot va muassasa rahbarlari hamda viloyatlardagi mavjud madaniyat, sport va turizm sohasida mehnat qilayotgan xodimlardan iborat jamoalar qatnashdi.

Musobaqa ikki bosqichda tashkil etilgan bo‘lib, birinchi bosqichi Respublikamizning barcha viloyatlarida tashkil etilgan edi. Ikkinchi bosqich esa viloytlararo 5 ta hududga bo‘linib, sportning stol tennisi, voleybol, shashka, shaxmat va minni futbol turlari bo‘yicha o‘tkazildi.