Ilk bor para togʻ changʻisi boʻyicha Oʻzbekiston chempionati oʻtkazildi.

Oʻzbekiston Respublikasi Prezidentining 2021-yil 18-maydagi “Paralimpiya harakatini rivojlantirishga doir qoʻshimcha chora-tadbirlar toʻgʻrisida”gi qarori ijrosini taʼminlash, qolaversa mamlakatimizda para sport turlarini keng ommalashtirish maqsadida Oʻzbekiston Milliy paralimpiya qoʻmitasi tomonidan bir qator tadbirlar amalga oshirib kelinmoqda. Kuni kecha “Amirsoy” togʻ-changʻi kurortida ilk marotaba oʻtkazilgan para togʻ changʻisi boʻyicha Oʻzbekiston chempionati ham soʻzimizni tasdiqlaydi.

Musobaqaning tantanali ochilish marosimida Sportni rivojlantirish vaziri oʻrinbosari Shaxrillo Maxmudov, Oʻzbekiston Milliy paralimpiya qoʻmitasi raisi Muxtorxon Tashxodjayev, Oʻzbekiston davlat Jismoniy tarbiya va sport universiteti rektori Mahmudjon Boltabayev, “Amirsoy” togʻ changʻi kurorti bosh direktori Saidvali Saidxoʻjayevlar soʻzga chiqib, soʻnggi yillarda hurmatli Prezidentimiz tomonidan qishki sport turlariga ham alohida eʼtibor qaratilayotgani va barpo etilayotgan zamonaviy sport majmualaridan unumli foydalangan holda para atletlarimizni qishki Paralimpiya oʻyinlarida ham munosib ishtirok etishini taʼminlash boʻyicha tizimli ishlar yoʻlga qoʻyilayotganligini mamnuniyat bilan taʼkidlashdi.

Qiziqarli kechgan musobaqa yakunlariga koʻra, para togʻ changʻisi boʻyicha ayollar oʻrtasida Asel Turdimuratova gʻoliblikni qoʻlga kiritdi. Ikkinchi oʻrin esa Yulduz Maxmudovaga nasib etdi. Erkaklar oʻrtasidagi bahslarda Firdavs Xudoyatovga teng keladigan raqib topilmadi. Kumush medalga Kamron Abduvohidov sazovor boʻldi.

Bundan tashqari, para snoubord hamda aravachada kyorling boʻyicha saralash musobaqalari ham oʻtkazilib, iqtidorlilar tanlab olindi.

Shubha yoʻqki, bu kabi tadbirlar mamlakatimizda para qishki sport turlarini ham jismoniy imkoniyati cheklangan yurtdoshlarimiz orasida keng ommalashtirishga xizmat qiladi. Ommaviylik bor joyda tabiiyki, raqobat va oʻsish boʻladi. Shunday ekan, Oʻzbekiston Milliy paralimpiya qoʻmitasi mutasaddilariga bu yoʻlda omad va muvaffaqiyatlar yor boʻlishini tilaymiz.