Mustaqil izlanuvchilikka talabgorlar bilan o‘tkazilgan suhbat natijalari haqida

O‘zbekiston Respublikasi Prezidentining 2020-yil 3 noyabrdagi PQ-4877-son qarori asosida muayyan ishlar amalga oshirilmoqda. 2021-yilning 5 yanvardan boshlab O‘zbekiston davlat jismoniy tarbiya va sport universiteti huzuridagi Jismoniy tarbiya va sport ilmiy tadqiqotlar instituti o‘z ish faoliyatini olib bormoqda.

O‘zbekiston Respublikasi Vazirlar Mahkamasi huzuridagiOliy attestatsiya komissiyasining 2022 yil 1 fevraldagi 35-sonli Rayosat qaroriga asosan Jismoniy tarbiya va sport ilmiy tadqiqotlar institutida pedagogika fanlari bo‘yicha falsafa doktori (PhD) ilmiy darajasini beruvchi Ilmiy kengash tashkil etildi. Unda 13.00.04-“Jismoniy tarbiya va sport mashg‘ulotlari nazariyasi va metodikasi” ixtisosligi bo‘yicha dissertatsiyalar himoyasini o‘tkazish hamda 08.00.13-“Menejment” (jismoniy tarbiya va sport yo‘nalishida) bir martalik Kengash tuzishga ruxsat berildi.

Bundan ko‘zlangan asosiy maqsad jismoniy tarbiya va sport sohasida xalqaro standartlarga muvofiq kompleks bilimlarga ega ilmiy-pedagogik kadrlarni tayyorlash, sportda ilm-fanni jadal rivojlantirish, xususan, ushbu sohada sog‘lom raqobat muhitini shakllantirish hamda ilmiy xodimlarni tayyorlash jarayonlarini yana-da takomillashtirishdan iboratdir.

Shu yilning 1 mart kuni O‘zbekiston davlat jismoniy tarbiya va sport universiteti huzuridagi Jismoniy tarbiya va sport ilmiy tadqiqotlar institutida 13.00.04 – “Jismoniy tarbiya va sport mashg‘ulotlari nazariyasi va metodikasi” ixtisosligi bo‘yicha jami 18 nafar (shundan falsafa doktori (PhD)-17 nafar, fan doktori (DSc) - 1 nafar) ilmiy darajasi uchun mustaqil izlanuvchilikka talabgor maxsus komissiya tomonidan suhbatdan o‘tkazildi.

Mazkur tadbir O‘zbekiston Respublikasi Vazirlar Mahkamasining 2017-yil 22 may “Oliy taʼlimdan keyingi taʼlim tizimini yana-da takomillashtirish chora-tadbirlari to‘g‘risida”gi 304-son qarori talablari asosida tashkil etildi.

Mamlakatimizning turli viloyatlaridan hujjat topshirgan hamda uzrli sabablarga ko‘ra suhbatga kela olmagan talabgorlarga qulay shart-sharoitlar yaratib berish maqsadida suhbat ZOOM dasturi orqali onlayn o‘tkazildi.

Suhbat davomida mustaqil izlanuvchilikka talabgorlardan har bir ilmiy ish jismoniy tarbiya va sport sohasining rivoji uchun, xususan, muayyan sport turining metodologik asoslariga xizmat qilishi, dissertatsiya natijalarini olishda izlanuvchining shaxsiy ishtiroki, o‘tkazilgan tadqiqot natijalarining qay darajada to‘g‘riligi, yangiligi va amaliy ahamiyati, dissertatsiya mavzusining ixtisoslikka mosligi, bundan tashqari o‘z yechimini kutayotgan mavjud muammolarni hal qilish zarurligi haqida foydali tavsiyalar berildi.

Eslatib o‘tamiz, mazkur qarorning 43-bandida mustaqil izlanuvchilikka talabgorlarni tanlab olish har chorakning uchinchi oyigacha bo‘lgan muddatda ixtisoslik bo‘yicha suhbat natijalari va ilmiy tashkilot yoki taʼlim muassasasidagi qabul komissiyasining tegishli xulosasi bo‘yicha amalga oshirilishi belgilangan.