Universitetmiz faxri Bekzod Abdurahmonov xalqaro turnirda bronza medalni qo‘lga kiritdi

Turkiyaning Istanbul shahrida erkin, yunon-rum va ayollar kurashi bo‘yicha reyting turniri bo‘lib o‘tdi. Ushbu musobaqaning uchchala yo‘nalishida ham O‘zbekiston terma jamoasi munosib ishtirok etdi. 

Biz uchun quvonarlisi, Tokio Olimpiadasi sovrindori, O‘zbekiston davlat jismoniy tarbiya va sport universitetining magistratura bosqichi 1-kurs talabasi Bekzod Abdurahmonov bu safar oʻz vaznini 12 kilogrammga koʻtarib, -86 kg vazn toifasidagi ilk xalqaro musobaqasida qatnashdi va yakunda bronza medalini qoʻlga kiritdi.

U bronza medali uchun kechgan bellashuvda Fransiya sharafini himoya qilayotgan asli kavkazlik Axmed Aybuyevni qiyinchilik bilan magʻlub etdi. Aniqrogʻi, ushbu bellashuv 4-4 hisobi bilan yakunlandi, ammo soʻnggi ochkoni aynan vakilimiz qoʻlga kiritganligi bois gʻalaba Abduraxmonovga berildi.

Shu tariqa, erkin kurash bo‘yicha O‘zbekiston terma jamoasi Turkiyadagi yilning dastlabki reyting turnirini 1 ta kumush, 2 ta bronza medali bilan yakunladi. 

Eslatib oʻtamiz, musobaqaning dastlabki kunida yunon-rum kurashchilarimiz 3ta oltin va bitta bronza medalini qoʻlga kiritishgan edi.