Parij olimpiadasi sovrindorlari qancha mukofot olishi ma’lum qilindi

Bugun, 14-fevral kuni O‘zbekiston Respublikasi Prezidenti “O‘zbekiston sportchilarining navbatdagi yozgi va qishki Olimpiya va Paralimpiya o‘yinlarida muvaffaqiyatli ishtirok etishi uchun tayyorgarlik ishlarini jadallashtirish to‘g‘risida”gi qarorga imzo chekdi.

E’tiborlisi, qarorning ilk bandida 2024-yili Parijda bo‘lib o‘tadigan Olimpiya va Paralimpiya o‘yinlarida g‘olib va sovrindor bo‘ladigan sportchilar qancha mukofot olishi belgilab qo‘yildi.

Unga ko‘ra, 2024 yil Fransiya poytaxti Parij shahrida bo‘lib o‘tadigan XXXIII yozgi Olimpiya va XVII Paralimpiya o‘yinlarida oltin medalni qo‘lga kiritgan sportchi 200 000 AQSh dollari bilan mukofotlanadi.

Nufuzli musobaqaning 2-o‘rini bilan taqdirlangan sportchilar 100 000 AQSh dollari bilan, 3-o‘rinni qo‘lga kiritgan sportchilarga esa 50 ming AQSh dollari mukofot tariqasida beriladi.

Qarorda belgilanishicha, mukofot pullari uchun xarajatlar Davlat budjeti mablag‘lari hisobidan qoplanadi.